1 Зряй, человече, сей гроб, сердцем умилися,
О смерти учителя славна прослезися:
Учитель бо зде токмо един таков бывый,
Богослов правый, церкве догмата хранивый.

2 Муж благоверный, церкви и царству потребный,
Проповедию слова народу полезный, -
Симеон Петровский от всех верных любимый,
За смиренномудрие преудивляемый.

3 Им же польза верные люди наслаждала,
Незлобие же, тихость, кротость удивляла;
В нем же вера, надежда, любы пребываше,
Молитва, милостыня, пост ся водворяше.

4 Мудрость со правдою им бысть зело храненна,
Мерность же и мужество опасно блюденна;
Многими дары богом бе преодаренный,
Непамятозлобием весьма украшенный.

5 Иеромонах честный, чистоты любитель,
Воздержания в слове и в деле хранитель
Ни о чесом же ином оный промышляше,
Но еже церковь, нашу мать, увеселяше.

6 Не хоте ино божий раб что глаголати,
Токмо что пользу может ближним создати;
Ничесоже ина творити любляше,
Точию еже богу непротивно бяше.

7 Иже труды си многи книги написал есть
И под разсуждение церковное дал есть;
С церковию бо хоте согласен он быти,
И ничтоже противно церкве мудрствовати.

8 Ибо тоя поборник и сын верный бяше,
Учением правым то миру показаше;
В защищение церкве книгу Жезл создал есть,
В ея же пользу Венец и Обед издал есть.

9 Вечерю, Псалтырь стихи со Рифмословием,
Вертоград многоцветный с Беседословием.
Вся оны книги мудрый он муж сотворивый,
В научение роду российску явивый.

10 Обаче и сего смерть от нас похитила,
Церковь и царство пользы велия лишила, -
Его же пользы ныне людие лишенны,
Зри сего в гробе сем кости положенны.

11 Душу же вручил в руце богу всемогущу,
Иже благоволил ю дати, везде сущу,
Да примет ю, яко свое создание,
И исполнит вечных благ его желание.

12 Телом со избранными даст ему возстати,
С ними же в десней стране в веселии стати
И внити в вечную небесную радость,
Неизглаголанную тамо присно сладость.

назад		далее